Американските кучиња на антидепресиви
Американските сопственици на кучиња се повеќе користат антидепресиви во третирањето на “кучешките проблеми“.
Било да станува збор за депресија или опсесивни пореметувања, третирањето на домашните галеничиња добива неверојатни размери.
Продажбата на апчиња за кучиња доживува “бум“ во Америка, а слично однесување би можело наскоро да биде забележано и во Европа.
Фармацевтската индустрија, во борбата за поголема заработувачка, ги убедува сопствениците на кучиња дека нивното однесување може да се регулира со психоактивни дроги и веќе постои цела серија на апчиња слични на Прозак, наменети за кучиња.
Американците кај своите домашни галеничиња со антидепресиви ја лекуваат заборавноста, прекумерната дебелина, депресијата и опсесивно компулсивното пореметување, што наводно се гледа во прекумерното лижење на шепите, “бркање“ на сопствениот опаш и лаењето, (а кое куче не лае?!)
Накусо, по терористичките напади од 11-ти септември, многу луѓе купиле кучиња, а тоа го искористи фармацевтската индустрија, ставајќи акцент на домашните галеничиња како на членови на семејството, бидејќи во тој случај нивните сопственици се подготвени да потрошат многу повеќе пари за нив, сметаат аналитичарите.
Втор важен фактор е дека се повеќе самци земаат кучиња и сакаат тие да се однесуваат како добро воспитани деца. Совршен став за хемиската контрола на нивното однесување што претставува се само не љубов кон животните.
