КАМПАЊА НА КОМУНАЛЕЦ ЗА ХУМАН ТРЕТМАН НА БЕЗДОМНИ ЖИВОТНИ

Премиерот Груевски ќе посвои куче?!

Политичарите, пејачите, актерите и други јавни личности се повикани да ја покажат својата хуманост и ако имаат услови да посвојат едно бездомно животно од стационарот Вардариште

Политичарите, пејачите, актерите и други јавни личности се повикани да ја покажат својата хуманост и да посвојат едно бездомно животно од стационарот Вардариште. Оваа кампања под мотото: "Дали треба да завршам на улица" ја почна Комунална хигиена, јавно претпријатие кое пред повеќе од една година ја презеде грижата за хуман третман на уличните животни и го отвори стационарот.
- Го повикуваме и премиерот Никола Груевски, зошто да не, доколку има услови да дојде во стационарот за да си одбере едно куче. Тоа ќе биде одличен пример за сите граѓани да се одлучат да им дадат шанса на животните од улица, за живот без страдање и болка - вели Златко Димовски, директор на ЈП Комунална хигиена. 

Мал е бројот на познати јавни личности кои пројавиле желба за посвојување, иако голем број од нив се декларираат како големи поборници за хуман однос кон животните. Еден од ретките којшто својата хуманост ја покажал на дело е популарниот пејач Мартин Вучиќ, кој минатата година, на сопствена иницијатива одлучил да вдоми едно куче од стационарот.

А сопствениците на кучиња без педигре велат дека нема помили и поверни животни од бездомните. "Вистински другари се, знаат да бидат благодарни што сте им подариле внимание, топол дом и храна. А и веднаш се адаптираат на домашни услови" -велат тие.

Од стартот на проектот, во септември, лани досега се заловени 1.630 кучиња од кои 901 биле болни и еутаназирани, 682 се стерилизирани и вратени на улиците, а само 103 биле посвоени. Заловените животни се стерилизирани, кастрирани, прочистени од цревни паразити, излечени и здрави, со жолта обетка на увото се враќаат на истите место од каде се земени. Меѓу скитниците имало и расни кучиња како што се ротвајлер, шарпланинец, самојад, златен ретривер.