PORTAL za DRESURA i se okolu KINOLOGIJATA - Kuce debelo kolku 8 godisno dete

Куче дебело колку 8-годишно дете

Кучето Печ е тешко колку просечно осумгодишно дете. Поради абнормалната тежина, зајчарот не може да се движи. За да го спасат, ветеринарните служби го ставија на ригорозна диета.

Кога за првпат бил примен во глазговскиот центар за кучиња, зајчарот имал 28 килограми, двојно повеќе од нормалната тежина на овaa раса,.

Печ не може да стои, бидејќи неговите мали нозе не можат да издржат толкава тежина, затоа е сместен во специјална торба со која го шетаат наоколу.

Поради абнормалната тежина, шестгодишното куче е изложено на повеќе здравствени ризици. Во следните неколку месеци, ветеринарните служби ќе се обидат да го сведат Печ на 15 килограми, што е многу поподносливо за неговиот организам.

- Печ за првпат дојде во центарот непосредно пред Божик, откако почина неговиот сопственик. Досега сме имале повеќе случаи на кучиња со прекумерна тежина, но ниту едно не било толку екстремно дебело како Печ. Штом го здогледавме веднаш знаевме што сè ќе треба да се преземе, вели Викторија Кели од центарот за кучиња.

Прекумерната телесна тежина на Печ може да резултира со откажување на срцето, црниот дроб, како и појава на дијабетес, панкреатитис и артритис. Сепак и пребрзото губење на телесната тежина може да придонесе за откажување на работата на виталните органи. Од овие причини зајачарот е ставен на постепена програма за слабеење, која се состои од кратки прошетки и хидротерапија.

- Кучињата кои се прејадувани, со повеќе вежбање можат да ја намалат нивната тежина. Но, во случајот на Печ, прекумерната тежина го спречува да вежба. Посебната торба спречува целосната тежина да се пренесе на нозете. Со неа секојдневно го шетаме. Од Божик досега, Печ има симнато еден килограм, што е особено добро, вели Кели.

Глазговскиот центар за кучиња во моментов е во потрага по нов сопственик за Печ, кој со помош на центарот ќе помогне во стабилизацијата на здравствената и физичката состојба на зајчарот.

- Бараме лице кое ќе сака со наша стручна и финансиска помош да му помогне на Печ. Сепак сопственикот ќе мора да може да му одолее на шармот на крупните кафени очи на Печ кои едноставно ве молат да му дадете уште да јаде, вели Кели.